Eŋlɔla: Ɖelaɖem Ofosu | Voltaonlinegh.com|

Aƒetɔ Fifi Fiavi Kwetey ame si nye agbaledziglã na NDC dunyaheha bia tso dunyaheha la ƒe akametiwo gbɔ be woado ŋusẽ ha la ƒe gɔmeɖokpea , asrɔ̃ nu tso nu siwo dzɔ va yi la ŋu eye woaƒo wo ɖokui ɖe eƒe ŋgɔyiyi nyawo me bliboe bena dziɖuɖu si dim wole le akɔdada si le ŋgɔ na wo me la nasu wo si .

Aƒetɔ Fifi Kwetey ɖe nya sia gblɔ le dunyaheha ƒe ŋkeke etɔ̃ wɔna si woɖo anyi na woƒe akameti yeye siwo wotia le Amugã nutome ƒe wɔnawo me le Dzodze, si le Ketu Nyiehe nutome nyitsɔ Blaɖagbe.

Wotu takpekpe la ɖe tomenyati si nye “Ŋusẽdodo gɔmeɖokpea hena dziɖuɖu le ƒe, 2024 me ” dzi eye wokpɔ mɔ be dunyaheha la ƒe akametiwo le Amugã nuto kple nuto suewo me la ado le agbɔsɔsɔ me, ade aɖaŋu tso nu siwo woate ŋu awɔ be zikpui siwo katã le sewɔtakpekpe me na Amugã nutoa la nasu ha la si. Woxɔe se hã be woato esia wɔwɔ me adzi dunyaheha la ƒe adodohehe le wɔna nyuiwo dede to me me le nutoa me la ɖe edzi.

Aƒetɔ Fifi Kwetey yi edzi bia tso dunyahehafalawo gbɔ be woatsɔ dunyaheha abe subɔsubɔ ene, ade bubu eŋu kple susu be ame bubuwo hã nate ŋu age ɖe wo dome be woate ŋu axɔ dukplɔzia le NPP dunyaheha sí.
Bubutɔ Dan Aboɖakpui, ame si nye zimenɔla na dunyaheha le Amugã nutome doe ɖe akameti yeyeawo gbɔ be woawɔ dɔ kutrikukutɔe hena dziɖuɖu hehe vɛ na dunyaheha la.

Source: www.voltaonlinegh.com