Volta Online
Ewe Ewe News

Agbledelawo ƒe Habɔbɔ Wɔ Ɖeɖefia Ku ɖe Amikuku le Keta ŊU

Amagbe-gbledelawo kple Edzralawo ƒe Habɔbɔ si le Keta Nutomea do ɖe ablɔdzi  heɖe woƒe vevesesewo ɖe go ku ɖe ɖoɖo yiwo le tome hena tomemikuku le atsiaƒua me le nutoa me ƒe nyawo ŋu.

Ɖeɖefia wɔna sia yi edzi le Yawoɖa, dzinu sia ƒe ŋkeke ewoa gbe le Anloga hetsi tre ɖe atsiaƒua ƒe dzidzime yi woɖo be woaza si nye, agbadzroƒe akpe etɔ sɔŋ le amia kuku mea ŋuti.

Ŋgɔnɔlawo na habɔbɔa be, nenye be woza atsiaƒua ƒe dzidzime ma gbegbe na amiakukua, agblẽ nu geɖe le yewo ŋu alebe fukpekpe kple aɖukliɖuɖuwo naga sɔgbɔ ɖe edzi na yewo le nutoa me.

Dziɖuɖu na mɔɖeɖe amiku-dɔwɔƒe, Swiss African Oil Company le ƒe 2016 me be wòaku ami le atsiaƒuwo me si lɔ̃nutome dziɖutakpeha atɔ̃aɖewo sɔŋ ɖe eme le Volta Nutoa me.

Ke habɔbɔa ƒe vɔvɔe nye be dɔwɔƒe sia ƒe wɔnawoa, agblẽ nu le yewo ƒe gbesiagbe dɔwɔnawo ŋu si na be, togbɔ be amikukua medze egɔme haɖe o ha, wode asi ɖeɖefiawɔwɔ me xoxo.

Le wɔna me nyitsɔ ma, dumevi geɖe siwo ƒe susu wɔ ɖeka kple ɖeɖefiawɔlawoa, do le agbɔsɔsɔ me henɔ nudodo dzĩwo me. Alebe, wowu woƒe azɔlia nu ɖe Nutome Dziɖutakpeha me le Keta, afi si wotsɔ woƒe vevesese  siwo wolé ɖe agbalẽ dzia, de asi na Mɔmefia, Aƒetɔ Seth Yormewu be wòato edzi aɖo Dukplɔla Nana Akufo-Addo gbɔ.

Nuŋlɔɖi aɖe siwo azɔlizɔlawo lé ɖe asi le wɔna mea, ƒe ɖewo yi ale: “Mawu ɖee Wotrɔ asi le míaƒe atsiaƒua ŋu hena abɔlu-nyinyi menye amikuku o, Amikukua avagblẽ míaƒe atsiaƒua kple anyigba dome, Míedzi amedzro aɖeke le Aŋlɔ-nyigba dzi hena amikuku o.”

Ɖeɖefiawɔlawo de dzesie kple vevesese be, esi wònye tɔsidɔe yewo dometɔ gbogbotɔwo wɔnaa, ne wòva eme be amikukua dze egɔmea, atsiaƒua agblẽ eye tsi si yewoyɔnãtso tome hena agbleme- nukuviwoa, agblẽ si aɖe fu na yewo.

Le ema ta, wodoe ɖe dziɖuɖua gbɔ be wòadzi mɔnu bubu hena atsiaƒua ŋudɔwɔwɔ be wòado agbledede kple tɔsisi boŋ ɖe ŋgɔ si aɖe vi na yewo ke manye be wòaɖe mɔ be amikuku naɖo tome si ade dumeviwo abe akpe alafa ade sɔŋ enea, ƒe agbe xaxa me o.

Eŋlɔla: Shelter Gakpey/voltaonlinegh.com

Related posts

Woɖo Kpe Oti Nutome Xɔxɔ Dzi Kple Kpekpe Gã Aɖe Le Jasikan

voltaonlinegh

Ɖekakpui Aɖe Si Wobui Be Enye Adzodala, Ɖe Eƒe Agbe Ɖa

voltaonlinegh

Wo Ɖe Ƒe Wuietɔ̃ Nyɔnuvi Aɖe Ƒe Agbe Ɖa Le Kpando

voltaonlinegh

Leave a Comment

%d bloggers like this: